قصيدة مغربية جميلة

الواصي

حيوط لمحبة رابو
ساس لمتين لقيتو راشي
لخوت كلها ساد بابو
ماهمني حالهم نسال ونقول علاشي
ضوء ليل طافي وشموعنا ذابو
راحة مالقيتها حتى ف فراشي
الخيط والمخيط زايد ف ثقابو
تهدينا من ترقاع لخناشي
الواصي علينا جامع صاحبو
هذا ليه وهذا ليك وباقي ماشي
خيرات لبلاد كلها ف حسابو
خويا وختي وداخل راشي


لله يا ريح قوية هـبي ف صيف
خودي لقبيح وخلي لمليح
شبابنا فطريق على جنب رصيف
لا شغل لا مشغالة لا اجر صحيح
خوف والقهرة رقابنا ممدودة لسيف
لسان الحق مطوي ما قدر يصيح
القلب عامر موسخ ماهو نظيف
علامنا ما وقف وقفة ساير يطيح
ساكتين طايعين فين صحاب نيف ؟
يزانا من كلام الخارف وتصنطيح
سوق خاوي وداخل ليه يطلب لطيف
لا صلاة لا عبادة ماشادين تسبيح

هشام الغيواني

نجوم وشعاع

نجوم ليل ما هي نجوم
دنيا حيرت كل مغبون
من حر الهم غاب النوم
لا تسال الهاني سال المسجون
بسلاسل الظلم مكتوم
طفات نار داك الكانون

الارض راوية لكحات
سطور لحكاية نقصات
ريوس شهبة شطحات
على شبابنا ضحكات

شعاع الشمس ماهو شعاع
وماشي كاع لمكور دلاح
لخامج ف سوق ما يتباع
وكلام صح رجع مزاح
اليد ما تعزف بلا صباع
خبزة ما طيب بلا فراح